අභ්යවකාශ ගමන් ගැන අලුතෙන්ම කතාබහට ලක්වෙලා තියෙන්නේ රුසියාවෙන් එන ආන්දෝලනාත්මක පුවතක්. ඒ තමයි, ඔවුන් විසින් නිපදවූ ප්ලාස්මා රොකට් එන්ජින් (Plasma Rocket Engine) මඟින්, අඟහරු ග්රහයා වෙතට යන ගමන මාස 7-9ක කාලයකින් දවස් 30ක් වැනි කෙටි කාලයකට අඩු කරන්න පුළුවන් කියන එක.
මේක කොහොමද වෙන්නේ?
සාමාන්යයෙන් අපේ රොකට් යානාවල පාවිච්චි කරන්නේ රසායනික ඉන්ධන (Chemical Fuels). මේ ඉන්ධන දහනය කරලා, පිටතට අධික වේගයකින් විසි කරලා තමයි රොකට්ටුව ඉදිරියට තල්ලු කරන්නේ. මේ වේගය සීමිතයි.
නමුත් රුසියාවේ රාජ්ය න්යෂ්ටික බලශක්ති ආයතනයක් වන Rosatom විසින් හදපු මේ අලුත් ප්ලාස්මා එන්ජිම වැඩ කරන්නේ සම්පූර්ණයෙන්ම වෙනස් විදියකට.
- ප්ලාස්මා භාවිතය: මෙය විදුලි බලයෙන් ක්රියාත්මක වන එන්ජිමකි. ඔවුන් ජලය වැනි ඉන්ධනයක් ගෙන, එය අධික ලෙස රත් කර, වායුවකටත් එහා ගිය ප්ලාස්මා තත්ත්වයට පත් කරනවා.
- චුම්බක බලය: ඉන්පසු චුම්බක ක්ෂේත්ර (Electromagnetic Fields) සහ අධි වෝල්ටීයතා විදුලිය යොදාගෙන මේ ආරෝපිත ප්ලාස්මා අංශු ඉතා විශාල වේගයකින් එන්ජිමෙන් පිටතට විසි කරනවා.
- වේගය: සාම්ප්රදායික රොකට්ටුවලට ළඟා වෙන්න පුළුවන් වේගයට වඩා දහස් ගුණයකින් පමණ වැඩි වේගයකට මේ ප්ලාස්මා ධාරාවට ළඟා වෙන්න පුළුවන්. ඔවුන් කියන විදියට තත්පරයට කිලෝමීටර් 100 ( පැයට කිලෝමීටර් 360,000ක්!) වැනි වේගයක් මේ මඟින් ලබා ගන්න පුළුවන්.
මේකේ වාසි මොනවාද?
- කාලය ඉතිරි වීම: ප්රධානම දේ තමයි අඟහරු ගමන දවස් 30-60 වැනි කෙටි කාලයකට අඩු වීම. මෙය අභ්යවකාශ ගමන්වලදී විශාල විප්ලවයකි.
- ආරක්ෂාව: අභ්යවකාශයේදී ගගනගාමීන්ට සිදුවන විශ්වීය විකිරණවලට නිරාවරණය වන කාලය බොහෝ සෙයින් අඩු වෙනවා.
- කෙටි මෙහෙයුම්: අඟහරුට ගිහින් ආපහු එන්න පවා මේ මඟින් පුළුවන් වෙනවා.
නමුත් අභියෝගත් තියෙනවා…
මෙය තාම පර්යේෂණාගාර මට්ටමේ (Laboratory Prototype) නිර්මාණයක්. පරීක්ෂණ සාර්ථක වුණත්, ඇත්ත වශයෙන්ම අභ්යවකාශයට යවන ‘පියාසැරි ආකෘතිය’ (Flight Model) 2030 වසර වන විට සෑදීමට ඔවුන් බලාපොරොත්තු වෙනවා.
මේ එන්ජිම ක්රියාත්මක කිරීමට අවශ්ය වන අධික විදුලි බලය ලබා දෙන්නේ න්යෂ්ටික බලාගාරයක් මඟින්. ඉතින්, ඒ සඳහා අවශ්ය තාක්ෂණය සහ ආරක්ෂක ක්රමවේද තවදුරටත් දියුණු කරන්නට සිදු වෙනවා.
කොහොම වුණත්, මේ ප්ලාස්මා එන්ජිම සාර්ථක වුණොත්, අඟහරුට යන ගමන සදහටම වෙනස් කරන්නටත්, සමහරවිට සෞරග්රහ මණ්ඩලයේ තවත් ඈතට යන්නටත් එය අපට දොරටු විවෘත කර දෙනු ඇති.
